Георгий, або по народному Дюра, Джуджар народзел ше у Дюрдьове 22.
априла 1954. року. Його оцец ше волал Владимир, а мац Наталия.
Основну школу закончел у Дюрдьове 1968. року. Стредню школу,
ґимназию , зоз вельку матуру, закончел у Українскей Папскей малей
семинариї св. Йосафата у Риме 1973. року.
Филозофски студиї закончел у рокох 1973-1975. на Папским
Урбаниянским универзитету у Риме, як богослов Українскей Папскей
велькей семинариї св. Йосафата на Дяниколо. Теолоґию студирал од 1976.
до 1979. року тиж на Папским Урбаниянским универзитету у Риме.
За священїка архиепископ Букатко го пошвецел у Дюрдьове 7. септембра
1980. року. После предлужел постдипломски студиї Восточного
Церковного права на Папским Восточним институту у Риме, и ту
одбранєл докторску дисертацию 1985.року. Теди робел як урядїк у
Конгреґациї за Восточни Церкви у Риме. Року 1991. достал титулу
Монсиньора – „Капелан Його Святосци“, а року 1995. титулу Монсиньора
„Прелат Його Святосци“.
Дня 3.марца2001. року бул меновани за титурного епископа Акрассо и
помоцного владику Мукачевского грекокатолїцкого владичества на
Закарпатю, у України. Епископске пошвецанє приял 19.марца 2001. року у
базилики св. Петра у Ватиканє з рукох святоґо папи Йоана Павла II.
Шветочне преглашенє Апостолского еґзархата одбула ше 2. новембра
2003. року у Руским Керестуре, у церкви св. Отца Миколая, дзе бул
меновани за першого Апостолского еґзарха.
Владика Георгий Джуджар обновел парохию у Беоґрадзе и основал два
нови парохиї – у Суботици и Бачкей Тополї. У його чаше докончене
будованє парохиялного дома у Старим Вербаше, докончена и пошвецена
каплїца у Водици, у Руским Керестуре докончене будованє Каритасового
центру и збудована крипта коло катедралней церкви, дзе поховани пейцме
владикове. З його намаганьом зробени преклад Святого Писма Нового
Завиту на руски язик, а дзекуюоци йому виходзи и „ Виснїк Апостолского
еґзархату“.
Златко Марковиновић
Фото: Руске слово
